Actuacións de Silvia Penas e Susana Otero para público familiar nas Festas de Vigo (agosto 2020)

Actuacións de Silvia Penas e Susana Otero para público familiar nas Festas de Vigo (agosto 2020)

Actividade rematada

Canta forte, conta piano

Día(agosto)             Lugar (o lugar exacto da actividade está nun plano no arquivo "Cartel das actuacións de Silvia Penas e Susana Otero")
5                                  Valadares
16                               Sárdoma
17                               Mercado Teis
19                               Bouzas

 

 Neste proxecto reunimos tres historias: o conto popular «O caldo de pedra», o conto rimado de Xosé María Álvarez Cácamo Dinosaurio Belisario e o conto do rato poeta Frederick de Leo Lioni, acompañado este último de textos poéticos para público infantil dos/as autores/as galegos/as Elvira Ribeiro, Fran Alonso, X.M.A. Cácamo e a portuguesa Matilde Rosa Araújo.

Os textos son contados e interpretados mentres o piano realiza unha ilustración sonora dos ambientes, dos personaxes e das accións. Lévanos á tonalidade grave do poder de Belisario, e á melodía doce do ollar de Frederick. Intríganos co seguinte ingrediente do caldo de pedra. A intención é crear unha intensidade sonora a través da voz e da música que atraia a atención dos/as cativos /as e estimule os sentidos e a imaxinación. Unha interpretación non só oral, senón tamén sonora dos contos e poemas que propoñemos.

1. O famoso conto popular «O caldo de pedra» pon de relevo a maneira de reaccionar dos seres humanos fronte á escaseza e a deseperación dos demais. Conseguir empurrar ás persoas a que fagan algo ou teñan empatía é máis fácil se as persuadimos de que van cooperar connosco e ser colaboradores nunha tarefa exitosa. A necesidade de supervivencia agudiza a intelixencia e a picaresca.

2. Belisario abusa do seu poder sobre os demais animais e sobre os nenos e nenas, ata que se unen para dicir as palabras que lle quiten todo o seu poder.
Dinosaurio Belisario é un conto con ritmo e rima que reforza valores coma o compañeirismo, a solidariedade e a amizade, así coma o poder da palabra.
Ten unha canción final para cantar en conxunto acompañados/as do piano.


3. Frederick é un rato, que durante o verán pasa as horas ollando o horizonte, moi pensativo e abraiado coa natureza mentres a súa familia traballa para xuntar alimentos para o duro inverno. Toda a familia lle bota en cara a súa nugalla, pero cando chegan o frío e a chuvia e xa non queda comida, a través de poemas, Frederick tráelles a luz do sol, as cores da primavera...
É unha historia que salienta a importancia da imaxinación, da palabra e da poesía nas nosas vidas.

Intercalaranse no texto de Leo Lioni, poemas infantís como se dixo anteriormente.


Bibliografía
Contos de ida e volta («O caldo de pedra»), escolma e reescritura de Xabier Xil Xardón, Difusora de letras artes e ideas, 2008.
Dinosaurio Belisario , Xosé María  Álvarez Cácamo, Kalandraka 2001.
As fadas verdes, Matilde Rosa Araújo 1994.
Palabras brancas, Elvira Ribeiro Tobío, ed. Xerais 2007.
O meu gato é un poeta, Fran Alonso, ed. Xerais 2011.
Tinta de luz, Xosé María Álvarez Cácamo, Chan da Pólvora, 2017.
Frederick, Leo Lioni, Kalandraka 2009.

 

 

Máis sobre o programa No verán... un conto