Que é o CIOV?

O CIOV é o Centro de Interpretación da Oralidade de Vigo creado polo Servizo de Normalización Lingüística (SNL) en outubro 2013.

Por que nace?

Dende 2009 o SNL leva traballando na recuperación e posta en valor da nosa tradición oral, e das novas formas de improvisación oral.

Que fai?

Organiza cursos de regueifas, contadas, slam, rap, teatro improvisado...(para centros escolares e para público en xeral), actuacións en distintas localizacións e horarios, certames…

Que obxectivos ten?

Formar persoas que saiban improvisar, que coñezan a tradición oral galega (regueifas, lendas, contos...) e as modernas representacións da oralidade (slam, rap...)

Achegarlle á cidadanía a improvisación e a tradición oral galega.

Quen é o profesorado?

O persoal que colabora e traballa no CIOV está formado por persoas cualificadas, expertas na didáctica e profesionais no seu campo.

Do mundo da regueifa contamos con Branca Trigo, Quique Estévez, Josinho da Teixeira, Luís O'Caruncho e Pinto d'Herbón; da sección de contos, historias e lendas con Dani Blanco, Marta Ortiz, Déborah Vukušić; e do mundo do Slam e da poesía con Silvia Penas.

Puntualmente, tamén se conta con achegas de Manoel da Costa, Xabier Ron, Paco Barreiro, Félix e Cástor Castro Vicente, grupos portugueses, rapeiros e rapeiras…

Onde está o CIOV?

As clases impartiranse no Verbum (Avda. de Samil, 17), pero o CIOV programa actividades en distintos espazos da cidade (prazas, cafés, bibliotecas…)

Formación

O Centro de Interpretación da Oralidade de Vigo organiza actividades de formación co fin de fomentar o uso da lingua galega en contextos onde é fundamental dominar a destreza da fala, aspecto polo que hai que pular no ámbito urbano vigués.

O cursos do CIOV empregan a regueifa, o rap, as contadas, o slam, o teatro improvisado etc., como ferramenta transversal para acadar os obxectivos propostos polo SNL do Concello de Vigo.

Dinamización

O Centro de Interpretación da Oralidade de Vigo consegue a través da súa actividade cotiá dinamizar o uso do galego entre a cidadanía viguesa.

Algúns dos obxectivos dinamizadores do CIOV son:

Crear espazos de uso do galego oral en Vigo.

• Fomentar o uso do galego entre a xente moza, vinculando a lingua a unha actividade moderna e centrada nos seus intereses.
• Dar a coñecer o patrimonio cultural e lingüístico galego en xeral e vigués en particular.
• Promover a creatividade, a expresividade, a capacidade discursiva en galego etc., entre a poboación de Vigo.
• Fomentar as relacións interpersoais en lingua galega.