Decote empregamos distintos recursos expresivos e amosamos aspectos da nosa personalidade diferente en función do contexto no que nos atopemos. Somos, dalgún xeito, actrices e actores das nosas vidas. Neste obradoiro tomaremos consciencia desta semellanza, trasladando eses recursos utilizados na nosa vida cotiá a un espazo de ficción, atopándonos nesa viaxe cunha serie de principios propios do teatro, que traballaremos dende un punto de vista eminentemente lúdico.

Empregaremos a creatividade teatral como recurso para fomentar a normalización da oralidade en galego como lingua de cultura e de ocio, para o que contemplamos dúas liñas de accións:
Incorporación de textos da literatura dramática galega contemporánea
Emprego da lingua como pauta nos xogos teatrais e nas improvisacións

O obradoiro será fundamentalmente práctico. Calquera concepto teórico desenvolverase a partir das problemáticas prácticas que xurdan no desenvolvemento das clases.

Este obradoiro está destinado a maiores de 18 anos non profesionais no eido das artes escénicas. O obradoiro é gratuíto.